Националната телевизија од Естонија ќе снима репортажа за Македонија

Денес во Македонија пристигна екипа на ТВ Талин-Национална телевизија од Естонија, која ќе снима репортажи на повеќе туристички локации низ нашава земја. За време на нивниот престој од три дена предвидена е посета на Скопје, Старата скопска чаршија со сите нејзини карактеристични обележија, скопската тврдина Кале, Кањон Матка, Св Јован Бигорски, Охрид со неговото културно и природно богатство и останати уникатни знаменитости, атрактивни за естонскиот туристички пазар. ТВ Талин се првите медиуми од Естонија кои ќе ја промовираат и доближат Македонија како турстичка дестинација и преку нивниот објектив ќе ја доловат културата, историјата, традицијата, храната и македонското гостопримство на кое нема да останат рамнодушни ниту естонските туристи.

Агенцијата за промоција и поддршка на туризмот (АППТ) на Република Македонија е организатор на ова информативно патување како поддршка за промовирање на нашата земја, со цел зголемување на бројот на туристи од Естонија, a со која од 1 јуни сѐ до 15 септември оваа година ќе бидеме поврзани со чартер линија Талин-Охрид-Талин.

Со првиот лет на естонскиот авиопревозник ‘Нордика’ на 1-ви јуни од Талин до Охрид ќе допатуваат уште една група новинари, претставници од повеќе медиумски куќи од Естонија. Новинарите ќе имаат можност да се запознаат со Охридскиот регион, кои со своите репортажи и објави ќе допринесат за промоција на Македонија на естонскиот туристички пазар.

На заедничко задоволство и со заеднички интерес за развој на туризмот во Македонија, кој е во насока на промоција и проширување на македонскиот туристички производ ова информативно патување се реализира во соработка со Нордика, ТАВ и општина Охрид.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.