Македонската ракометна репрезентација вечер од 20 часот и 30 минути во Вараждин против Чешка ќе го одигра својот втор дуел од втората фаза на Европското првенство.
Во последните шест години, Македонија и Чешка дури шест пати играле меѓусебе во квалификациските циклуси или на европски првенства
Од исходот на овој натпревар зависи дали Македонија ќе ги задржи шансите за полуфинале. За да се случи тоа „црвено-жолтите“ мораат да победат, а дали ќе триумфираат во голема мера ќе зависи дали ќе игра капитенот Кирил Лазаров.
По вчерашните медицински прегледи и снимки во Загреб, не беше решена дилемата дали Лазаров ќе му биде на располагање на селекторот Раул Гонзалес. Од таборот на нашата репрезентација уверуваат дека се што е во нивна моќ ќе направат Лазаров да биде на теренот, но сепак тоа ќе зависи од видот и тежината на повредата.
Се очекува на теренот да се врати Филип Миркуловски кој беше поштеден на неделната средба со Шпанија.
Со евентуална победа, Македонија ќе остане во игра за висок пласман. И Македонија и Чешка во вториот круг стартуваа со порази. Македонија загуби од Шпанија, а Чесите беа совладани од Германија.
Табела Група 2: Данска 6 бода (4 натпревари), Шпанија 4 (3), Германија 4 (4), Македонија 3 (3), Чешка 2 (3) и Словенија 1 (3).
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
