Македонската ракометна репрезентација во моментов го игра вториот натпревар на Светското првенство во Франција.
По 30 минути против селекцијата на Ангола нашите репрезентативци имаат предност од пет голови (14-9). По самиот старт откако ја преземавме иницијативата тактиката за брза игра и реализација од контри и полуконтри не вроди со плод за преземање на водството бидејќи голманот на Ангола, Муачисенге успеа да фати три топки и со тоа покаже дека неговата репрезентација иако важи за аусајдер, не е така наивна репрезентација.
По почетното водство од 4-1, Ангола со неколку удари од далечина успеа да дојде до израмнување од 5-5 со што го натера Червар да победа тајм-аут. По паузата во нападот заигравме поангажирано со седумина во поле и тоа вроди со плод бидејќи Анголците оставаа повеќе простор за крилата, а тоа го искористија Гоце Ојлевски и Гоце Георгиевски и со четири гола ја создадоа предноста.
Капитенот Кире Лазаров одлично ги проигрува неговите помлади колеги кои очигледно ги најдоа слабите точки на противничкиот голман и со серија на лоб удари ја направија разликата.
Во второто полувреме се очекува да продолжи ваквата игра на првата постава и со тоа да им овозможат и на резервистите од клупата да ја почуствуваат мундијалската атмосфера.
Најефикасни во нашиот состав се Лазаров со пет и Георгиевски со четири гола, додека бекот кај Анголците, Антонио на трипати го матираше голманот Колев.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
