Македонија е меѓу најмалку задолжените земји во Европа и во регионот. Министерството за финансии денеска ги објави податоците за државниот и јавниот долг кои изнесуваат 41,9 отсто и 50,6 проценти за третиот квартал од 2016 година.
Како што велат од Министерството за финансии, зголемувањето на државниот и јавниот долг во однос на вториот квартал се должи на издавањето на еврообврзницата во јули 2016 година, која е наменета за покривање на буџетскиот дефицит во 2016 и 2017 година. Со еврообврзницата ќе се покријат повеќе обврски кои доспеваат во текот на оваа и наредната година, како отплата на 130 милиони евра која ќе се изврши во ноември по основ на доспеан кредит.
Согласно податоците на Еуростат, Македонија со новата состојба на државниот долг останува меѓу најмалку задолжените земји во Европа, а државниот долг е двојно помал од просечниот долг на земјите членки на ЕУ кој изнесува 85 проценти од БДП.
Македонија е и меѓу најмалку задолжените земји во регионот, согласно европската статистика. Само Бугарија има понизок државен долг од Македонија со 29,4 отсто. Повеќе задолжени се Црна Гора со 61,8 отсто, Албанија со 69,8 отсто, Србија 71,9 отсто, Словенија 82,3 отсто, Хрватска 84,5 отсто и Грција 179,2 отсто.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
