Прва конференција за инвестиции во недвижности во Македонија ќе се одржи денеска во Скопје, во организација на електронската аукциска куќа за недвижен имот Е-аукција.мк и консултантската компанија „Нолиџ центар“ (Knowledge center).
На конференцијата ќе бидат презентирани актуелните трендови на пазарот со недвижности во Македонија и ќе се укаже на можностите кои постојат во овој сектор. Настанот е можност да се поврзат сите субјекти кои работат во оваа област.
Според најавата од организаторите, на конференцијата ќе се обратат вицегувернерот на Народната банка на Република Македонија, Анита Ангеловска-Бежоска, директорот на Агенцијата за катастар на недвижнини Славче Трпески, како и Андреа Серафимовски, претседател на Здружението на градежништво при Стопанската комора на РМ, и Бранко Ѓуровиќ, проект- менаџер на Е-аукција.мк.
Е-аукција.мк е прва електронска аукциска куќа за недвижен имот во регионот. Таа е производ на проектот „Аукциски тигар“, поддржан од компанијата „Нолиџ центар“ и Фондот за иновации на РМ. Целта на „Аукциски тигар“ е да го раздвижи пазарот на недвижнини во земјава, да понуди решение за побрзи трансакции и зголемување на ликвидноста на компаниите и институциите кои имаат имот по основ на побарувања, да го отвори пазарот за странски инвеститори и фондови кај кои електронското наддавање е воспоставена пракса.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
