„Истерувачите на духови“ („Ghostbusters“) се враќаат на голема врата по 30 години откако омилената франшиза не освои со својот хумор. Овојпат освежени не само со одлично избраната актерска екипа од Мелиса Мекарти, Кристен Виг, Кејт Мекинон Лесли Џонс и Крис Хемсворт, туку и со свежиот пристап кон комиката на светот на натприродните појави на режисерот Пол Фејг.
Премиерата на филмот во Скопје ќе биде на 28 јули во киното „Синеплекс“
Во изработката на визуелните ефекти на овој проект учествуваше и македонската компанија за анимација и визуелни ефекти ФХ3Х, во соработка со MPC Technicolor од Лондон.
– Во соработка со нашиот долгогодишен клиент MPC Technicolor од Лондон учествувавме во изработката на визуелните ефекти на филмот „Истерувачи на духови“ од познатата франшиза, овојпат со нови ликови во познатиот концепт. На овој проект работеа 103 артисти во периодот од ноември 2015 до јули 2016 кои работеа на над 300 кадри, што е околу 17 мин од филмот. Филмот е забавен и се надеваме дека сите ќе уживаме во него – изјави Кристијан Даниловски, еден од основачите и ко-сопственик на ФХ3Х.
„Истерувачи на духови“ е американска акциона комедија за натприродните појави и рестартирање на популарната франшиза на парапсихолози, кои развиваат бизнис за лов на духови во Њујорк. Ерин Гилберт и Аби Јејтс се две непризнаени авторки на книга во која тврдат дека духовите се реални и вистински. Неколку години подоцна, Гилберт успева да добие престижно професорско место на Универзитетот на Колумбија, но кога нејзината книга ќе се појави, исмеана е и исфрлена од академските кругови. Откривањето на масивна река од ектоплазма и појавување на спектрална активност им овозможува на тимот на истерувачи на духови да си го живнат бизнисот.
Кога духовите ќе го нападнат Менхетен, Гилберт повторно се обединува со Јејтс, и ги земаат во тимот и Џилијан Холцман која е нуклеарен инженер и Пати Толан, работничка во подземната железница, за да го спасат светот од моќниот демон Роан кој може да ги контролира луѓето.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
