Премиера на филмот „Ема“ на 3 ноември: Прв македонски филм снимен од тинејџери за тинејџери

Долгометражниот филм “Ема”, снимен целосно од група македонски тинејџери кои се и главни актери во ова остварување за кое во изминатиот месец многу се зборуваше во медиумите и јавноста, ќе има своја премиера на 3 ноември (19 часот) во киното Синеплекс во Скопје.

-Ема сме сите ние и сакаме да се слушне нашиот глас, бидејќи сите ние водиме внатрешни битки. Сакавме да ги покажеме сите стравови и дилеми на младите во денешното општество со сите негови пороци, а кој најдобро може да го направи тоа, ако не ние самите, велат протагонистите.

Насловната улога “Ема”, пак, во филмот ја игра Ангела Спировска. Ема е 17-годишна девојка која ги има сите желби, очекувања и дилеми како и секој млад човек на нејзина возраст, а токму нејзините другари и познаници ја заокружуваат целата нејзина приказна.

Во филмот главните ликови покрај Ангела Спировска ги толкуваат и Антонио Кухар, Мартин Чичовски, Вања Тројачанец, Оливера Каменаровска, Лина Бојаџиева, Аника Чорбевска…

Филмот ќе има проекции во Синеплекс до 10 ноември, а заинтересираните ќе можат да направат резервации и на инстаграм профилот @marvieproductions..

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.