Тениската репрезентација на Македонија не успеа да го освои првото место во група Б од Третата Европска зона од Дејвис купот откако вечерва во Талин, Естонија го загуби дуелот со Република Ирска со 2:1. Со ова нашите тенисери не се изборија за дуел со Кипар и евентуален пласман во Втората Евро-африканска зона.
Во решавачкиот меч во двојки Томислав Јотовски и Димитар Грабул загубија од Сем Бери и Дејвид О‘Хер со 6:3 и 6:2 во сетови за точно еден час игра.
Во двата сингл меча двете репрезентации остварија по една победа. Најпрвин Грабул го победи Бјорн Томсон со 2:1 во сетови, а потоа Јотовски загуби од Бери со 2:0 во сетови.
Утре во полуфиналните мечеви ќе играат Естонија – Молдавија и Кипар – Република Ирска, а победниците од дуелите ќе се пласираат следната година еден ранг повисоко. Македонија и следната година ќе игра во Третата Европска зона од Дејвис купот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
