Македонската фудбалска репрезентација на арената „Филип втори“ во Скопје со почеток од 13 часот го игра вториот пријателски натпревар откако на клупата е новиот селектор Игор Ангеловски. Секако сите во таборот на репрезентацијата посакуваат да се повтори убедливата игра како во натпреварот со Црна Гора кога нашата селекција победи со 4-1.
– Имавме доволно време да собереме информации за Либан. Тоа е добро организирана селекција која има ранкинг сличен на нашиот. Тие се во тек на квалификациски циклус и сигурно дека ќе имаме добра проверка и на утрешниот меч. Но, наша цел е тоа што беше добро од дуелот со Црна Гора да го повториме и од натпревар во натпревар да ја градиме играта која сакаме да биде препознатлива за нашиот национален тим – изјави Игор Ангеловски.
Не е тајна ниту составот, селекторот не сака да менува, единствено треба да се донесе одлука за замената на Ибраими.
„Нема зошто да го кријам составот. Ќе стартуваат истите десетмина како и против Црногорците, а ќе одлучиме кој ќе влезе на местото на Агим Ибраими, кого го ослободивме за овој втор пријателски натпревар“, порача Ангеловски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
