Македонската компанија за анимација и постпродукција е дел од проектот на најновиот Марвелов филм „Fantastic Four“, во соработка со MPC Tehnicolor.
Кристијан Даниловски, ко-сопственик и извршен продуцент во ФХ3Х за оваа соработка изјави дека на овој проект беше ангажирана група од 20 артисти, кои во периодот од јануари и февруари годинава работеа на 94 кадри.
– Филмот е модерна преработка на оригиналната приказна на најстариот Марвелов суперхеројски тим, и ова е веќе десетти Марвелов проект во кој сме вклучени. Пристапот кон модернизирањето е одличен, приказната е земена од The Ultimates, што за фановите значи свежа приказна, помлад тим и поатрактивна динамика. Овој пат во однос на ефектите во филмот, можеме да кажеме дека ликот на The Thing е целосно компјутерски изведен по пат на motion capture технологија, и само очите на актерот се оние кои не се компјутерски обработени, изјави Даниловски.
Според сценариото, четворица млади астронаути се телепортираат во далечен универзум и нивната физичка човечка форма се менува заради радијацијата со што добиваат натприродни способности. Четворицата мора да ги прифатат своите нови способности и да соработуваат како тим за да ја спасат планетата Земја од поранешен пријател кој е всушност непријател.
Филмот нуди една многу поинаква верзија на првото семејство на Марвел кое го видовме во 2005, овојпат со интересен и атрактивен осврт на алтернативните димензии, телепортацијата, црните дупки и невидливоста.
Др. Мичио Каку (Dr. Michio Kaku), теоретски физичар, на кого ликовите од „Фантастичната Четворка“ му биле омилените суперхерои во детството, тврди дека некои од теориите за алтернативни димензии и не се толку далечни како што изгледаат. Според него, науката и фантазијата не се многу далеку една од друга.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
