Нема опасност по здравјето на пациентите доколку од еден вид инсулин се префрлат на друг соодветен инсулин под надзор на квалификуван специјалист од областа на дијабетесот. Најважно за пациентите е да имаат добра гликемиска контрола, како и да се придржуваат до советите на нивните лекари во однос на исхраната, физичката активност, избегнувањето на стресот, честото мерење гликемија, како и соодветниот третман на напоредните заболувања.
Ова во соопштение го истакнува претседателот на Научното здружение на еднокринолози и дијабетолози на Република Македонија проф. д-р Татјана Миленковиќ. Во Република Македонија во моментов, посочува таа, има континуирано снабдување со најсовремена инсулинска терапија од најдобрите светски производители на инсулин, и во делот на хуманите инсулини и во делот на инсулинските аналози, така што за секој пациент со дијабетес поставен на инсулинска терапија постојат повеќе ефикасни и безбедни алтернативни опции.
– Апелираме за воздржување од давање какви било изјави во јавноста, кои се медицински неиздржани и со кои се шири страв и паника кај пациентите, и воедно ги повикуваме сите заинтересирани целата дебата да ја водат со својот лекар, односно во стручните медицински кругови, каде што ќе ги добијат и одговорите на нивните дилеми и прашања. Сè што ќе биде надвор од ова, ќе го сметаме за крајно неодговорно, што не е во интерес на грижата за пациентите со дијабетес во Република Македонија – се вели во соопштението.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
