Седум нови амбасадори утре и задутре ќе стапат на должност во Македонија по предавањето на акредитивните писма на претседателот Ѓорге Иванов, прво во неговиот втор мандат.
Нови амбасадори испраќаат Полска, Велика Британија, Кина, Албанија, Финска, Летонија и Република Ирска.
Како што соопшти кабинетот на претседателот Иванов, на местото на досегашниот британски амбасадор Кристофер Ивон кој воедно беше и доајен на дипломатскиот кор во земјава, доаѓа Чарлс Едмонд Гарет.
Гарет во британската дипломатија работи од 1987 година, а зад себе има искуство во британските претставништва во Хонг Конг, Никозија, Берн и Тајпеј.
Нов доајен на дипломатскиот кор, односно амбасадор со најдолг стаж во земјава, ќе биде швајцарскиот амбасадор Стефано Лазарото.
Нов амбасадор на Народна Република Кина, на местото на Цуи Живеи, е некогашниот новинар Вен Џеншун, кој магистрирал на Академијата за дипломатска политика во Виена, а зад себе има искуство во Директоратот на западно-европски работи во кинеското МНР, како и во амбасадите на неговата земја во Германија и во Луксембург. Во Скопје доаѓа од местото генерален конзул во Франкфурт.
Поранешен новинар ќе раководи и со Албаската амбасада во Скопје. Петрит Бушати, покрај 11-годишната новинарска кариера, зад себе има и дипломатско искуство во претставништвата на Албанија во Виена, Стокхолм и Вашингтон.
Нов полски амбасадор Македонија ќе биде филологот Јацек Стефан Мултановски, кој зад себе има искуство во амбасадите во Алмати и Тбилиси, како и во одделенијата за Европа и Русија во полското МНР.
Нов амбасадор на Финска, со седиште во Загреб, е Тимо Рајакангас, додека нов амбасадор на Латвија, со седиште во Прага, е Албертс Сарканис. Нов амбасадор на Република Ирска, со седиште во Букурешт, е Џерард Кор.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
