Вистинска голеада имаше на фудбалските терени во македонската Прва лига попладнево со вкупно 19 погодоци на пет натпревари или, во просек, речиси по 4 на натпревар, а главна вест е новиот неуспех на Вардар. Актуелниот шампион и четврти пат по ред не успеа да победи играјќи нерешено 2-2 против Македонија Ѓорче Петров.
Вардар прокоцка и предност од 2 гола бидејќи по само 4 минути игра водеше со 2-0 со головите на Петров и на Асани. Домаќините намалија на 1-2 со погодокот на Адем од пенал во шестата минута, а потоа останаа со играч помалку по исклучувањето на Најдовски во 20. минута.
Сепак, борбените играчи на Македонија успеаја да израмнат со голот на ветеранот Јанчевски во финишот на првиот дел и до крајот одолеаја на нападите на шампионот. Со новиот неуспех, Вардар падна на петтата позиција на табелата со 39 бода.
Лидер е Пелистер по убедливата победа од 3-1 во Кичево против Напредок. Битолчани се први со 44 бода. Со идентичен резултат Шкендија во дербито на колото го совлада Работнички, а најубедлив беше Металург со триумф од 5-1 против отпишаниот Гостивар. Турново загуби во Штип од Брегалница со 0-1, а утре се игра мечот во Тетово меѓу Ренова и Еуромилк.
Табела: Пелистер 44, Турново и Работнички по 41, Металург 40, Вардар 39, Шкендија 33, Брегалница 32, Ренова 31, Еуромилк 30, Македонија Ѓ.П. 23, Напредок и Гостивар по 14.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
