Изборниот процес е под сериозен ризик. Изборниот процес не е демократски и не е во фер атмосфера. Власта директно го узурпира процесот. Зоран Заев и СДС продолжуваат со целосна злоупотреба на државата и на државните институции за партиски цели во изборен процес. Исплашени од се послабата поддршка од граѓаните и од слободниот пад на нивниот рејтинг СДС ги узурпира државните институции и врши масовен поткуп, обвини Крсте Јовановски од ВМРО-ДПМНЕ.
Тој вели дека медиумите објавиле фотографии од кои се гледа како во текот на вчерашниот ден кандидатот за градоначалник на СДС за Прилеп заедно со пратеничката на СДС од Прилеп и директорот на Центарот за социјални работи во Прилеп делат зејтин и прехранбени намирници во Ромското маало во Прилеп.
-СДС се фатени на дело како вршат предизборен поткуп. Целиот случај е фотографски документиран. СДС и нивните функционери вршат кривично дело, изборен поткуп. СДС го прекршуваат чл. 162 ст.1 од Кривичниот законик, кој вели: „Тој што на лице со избирачко право му нуди, дава или ветува подарок или друга корист, со намера да го придобие да го врши, да не го врши или како да го врши избирачкото право, ќе се казни со затвор најмалку пет години“. Изборниот поткуп кој го врши СДС не смее да остане неказнет. ВМРО-ДПМНЕ го повикува надлежното јавно обвинителство да отвори случај и да отвори индивидуална кривична одговорност за инволвираните во поткупот, изјави Јовановски.
Тој вели дека СДС мора веднаш да престане со злоупотреба на државните ресурси за партиски цели. Тој порача дека меѓународната заедница, но и граѓаните на Република Македонија очекуваат фер, слободни и демократски избори.
-Апелираме, но и ги повикуваме сите надлежни институции, но и набљудувачи на изборниот процес, кои се должни да интервенираат, да го сторат истото. Република Македонија мора да има фер и демократски избори. Граѓаните ги гледаат манипулациите и лагите на СДС и на Зоран Заев и својот збор ќе го кажат на 15-ти октомври, изјави Јовановски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
