Вечерва во рамките од четвртото коло на Светското првенство во Франција со почеток од 20.45 часот, македонската ракометна репрезентација го игра можеби најтешкиот дуел против поранешниот светски шампион, Шпанија.
Овој дуел можеби нема никакво значење за избраниците на Лино Червар бидејќи сите мисли на целокупната македонска јавност се насочени на дуелот со Исланд кој се игра в четврток. Сепак македонските борци во пресрет на овој дуел најавуваат дека против Шпанија нема да излезат со бело знаме, ќе играат концетрирано во текот на сите 60 минути и доколку им се укаже шанса да поволен резултат ќе ја зграбат со двете раце.
Во „црвено-жолтиот“ табор ја знаат силината на еден од конкурентите за највисок пласман на овој мундијал и не се залажуваат дека со сигурност ќе стигнат до победата. Таа не е императив и како и капитенот Кире Лазаров и останатите ракометри изјавите се дека примарно е да не се случи некоја несакана повреда со што би ги оддалечил клучните играчи за мечевите кои следат.
Червар повторно нема да менува ништо во составот и на теренот во Мец ќе истрча со истите 16 ракометри со кои ги одигра и претходните три натпревари иако постоеше опција на голманската позиција да го вклучи и Никола Митревски кој од првиот ден на Светското првенство се наоѓа со целата делегација и мирно ја чека својата шанса.
Судиската двојка е добро позната за спортската јавност во Македонија бидејќи литванските судии Миндаугас Гателис и Ваидас Мазеика веќе ја делеа правдата на нашата репрезентација во натпреварот од второто коло против Ангола во кој извојувавме победа.
Да се надевема дека токму тие ќе ни бидат среќни во вечерашниот дуел и нашите ракометари ќе извојуваат поволен резултат.
Досега македонската ракометна репрезентација ниту еднаш не извојувала победа на „шпанската фурија“ во официјален меч од големите натпреварувања, но тоа не значи дека неможе да се случи токму на овој дуел кој сепак за Шпанците има поголемо значење бидејќи се борат за прво место во групата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
