Театарот за деца и младинци вечер премиерно ќе ја изведе претставата „Животинска фарма“ според романот на Џорџ Орвел, во режија на Александра Кардалевска и драматизација на Драгана Лукан Николоски.
Ова дело, кое заедно со „1984“ му донесе слава на Орвел непосредно по Втората светска војна, опишува бунт на фарма која животните ја преземаат од сопственикот Џонс, сакајќи поубав свет без доминација на луѓето. Преку текстот, авторот на сатиричен начин ги прикажува случувањата во Русија помеѓу двете светски војни, со алузии за предавството на Руската револуција од страна на Сталин и неговите следбеници, чистките, монтираните процеси, злоупотреба на народот од новата елита.
Режисерката Карадалевска (1984) на прес-конференција рече дека со секое препрочитување на делото сфатила дека оваа тема е постојано актуелна.
Со ова дело, рече таа, се покажува дека стилот на Орвел е едноставен, а со две нишки во исто време политички и уметнички.
– Не може да не се зборува за еден политички контекст во приказната, меѓутоа тој е многу универзален и е актуелен за нашето секојдневие. Претставата зборува за борбата за власт, за злоупотреба на власта, а за да биде возможно сето тоа, вметната е приказна за сеопфатна машинерија, за современото угнетување, нешто што порано се викаше пропаганда, а сега политички маркетинг, еден севкупен систем со кој се контролира мислата на населението. Група животни од една фарма решаваат да се ослободат од човекот-тиранин кој носи само зло, прават систем во кој живеат во благосостојба сѐ додека во еден момент не почне да се руши и да се создаде негативната утопија за која зборува делото – истакна Кардалевска.
Во актерската екипа се: Владимир Лазовски, Ненад Митевски, Мики Анчевски, Бојан Кирковски, Предраг Павловски, Изабела Новотни, Катарина Илиевска Силјановска, Симона Спировска, Наташа Петровиќ, Емра Куртишова, Марија Ѓорѓиевска и Мартин Јорданоски. Сценограф е Никола Кунгуловски, костимограф Маја Димовска, а музиката е на „Бернејс пропаганда“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
