Во денешната експлозија на метан во рудникот „Засјадко“, кај Донецк, загинало едно лице, а „32 рудари се водат за исчезнати и се трага по нив“, изјави претседателот на украинскиот Парламент, Володимир Гројсман, пренесе ТАСС.
Гројсман претходно изјави дека во експлозијата загинале 32 лица.
Според податоците на Министерството за вонредни ситуации на самопрогласената „Донецка Народна Република“, под земја се блокирани вкупно 73 лица, а досега има еден загинат и 14 повредени.
Според министерството, претпоставената причина за трагедијата е „експлозија на воздушно гасна смеса “.
Министерството информира дека е почната спасувачка операција во рудникот.
Според портпаролката на министерството, Јулијана Бедило, инцидентот кај Донецк, регионот што е под контрола на украинските сепаратисти, не се должи на артилериски напад, забележуваат американските медиуми.
Општинскиот службеник од Донецк, Иван Приходко, за локалните медиуми изјави: „да се зборува за бројка на жртви во моментов не е нималку етички се додека спасувачите не стигнат до затрупаните рудари“.
Во последните 15 години во рудникот за камен јаглен „Засјадко“ имаше пет сериозни хаварии. Најголемата се случи на 18 ноември 2007 година, во која имаше 101 загинат рудар, забележа ТАСС.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
