Концерт на македонски и хрватски песни и ора на Прилепско културно лето

Вечерва со почеток во 20.30 часот на камената бина на плоштадот „Александрија“ ќе се одржи концерт на кој ќе настапат КУД „Анка Ошпух“ од Лудбрег, Хрватска и КУД ,,Мирче Ацев“ – Прилеп. Концертот е во рамките на Прилепското културно лето, а друштвата ќе се претстават со дел од нивниот богат репертоар на хрватски песни и ора и на македонски ора.

КУД „Анка Ошпух“ работи од 1976 година, откако се собрале жените од лудбрешките фабрики и го формирале друштвото. Најпрво профункционирала фолклорната секција, па тамбурашите, пејачката група, а потоа драмската, ритмичката и женската вокална група „Пајдашици“. Низ друштвото досега поминале над 2000 граѓани од Лудбрег и околината. Денеска брои 130 члена, додека фолклорниот ансамбл го сочинуваат стандардно 20 играорци. Досега друштвото гостувало во Германија, Италија, Чешка, Унгарија, Австрија, а трипати било дел од Светскиот фолклорен феситвал во францускиот град Хаген. Гостувале и на „Охридско лето“. Ансамблот игра, игри од сите краеви на Хрватска, до Загорје, Подравина, Славонија, до Лика и Далмација. Друштвото има богат фонд на комплетни носии со вредни инструменти.

КУД”Мирче Ацев” КУД”Мирче Ацев” е прилепски амбасадор, кој низ годините го промовира македонскиот фолклор и традиција низ светот. Формирано е 1947 година и во текот на досегашното постоење илјадниците играорци дале преку 3500 концерти не само во Македонија, туку и во странство. Ансамблот, кој работи под раководство на Атанас Гагалески, гостувал речиси на сите континенти во светот, презентирајќи го македонскиот филклор. За одбележување се освоените први места во Ланголен – Англија, Миделкерке во Белгија, Овидео- Шпанија, во Ница- Франција, настапите во Полска, Мароко, Франција, Бугарија, Германија, Данска, Албанија, Турција, Хрватска, Србија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.