Вардар на реванш против Стеауа, за поправање на впечатокот од Букурешт

Македонскиот шампион Вардар утре од 20.45 часот на арената „Филип Втори“ во Скопје ќе игра против Стеауа, за поправање на впечатокот од првиот дуел во Букурешт, кога е претрпен пораз од 0-3, во лоша игра.

Вардарци ги повикаа навивачите да дојдат и да го бодрат својот тим, а ветуваат многу подобро издание и борбеност од прикажаното на натпреварот што се одигра на 16 јули.

– Сакам да им се заблагодарам на навивачите што нѐ бодреа во Букурешт и да ги повикам сите останати да дојдат и да ни дадат поддршка. Ќе сториме сѐ за да се претставиме во вистинско светло. Стеауа е голем клуб, моќен колектив, но и Вардар е таков, за македонски услови. Не се предаваме, ќе играме за клубот, за рејтингот на македонскиот фудбал, иако резултатот од првиот натпревар не е поволен за нас – изјави капитенот Раденко Бојовиќ.

Тој беше една од ретките светли точки на Вардар во Букурешт, а сега треба да се „подразбуди“ комплетниот состав за да има на што да се надева во реваншот. Романците ќе дојдат ослабени во Скопје, без стоперот Влад Кирикеш и без стрелецот на првиот гол Кристијан Танасе, но, сепак, според искуството, квалитетот и вредноста на играчите, 24-кратниот првак на Романија повторно е фаворит.

– Нема спортист што ќе се откаже предвреме. Верувам дека во Букурешт имавме слаб ден, дека можеме многу подобро, и тоа со поддршка од навивачите ќе го покажеме на утрешниот реванш во Скопје. Подготвени сме за предизвикот, сигурен сум дека сите фудбалери ќе го дадат максимумот. Стеауа е силен ривал, што не дозволува така лесно да го загрозиме нивниот гол. Но, од друга страна, Вардар е најдоброто од Македонија и каков таков треба да ја има поддршката од фановите – изјави тренерот на Вардар, Благоја Милевски.

Билетите за натпреварот веќе се во продажба по цена од 150 денари за север и југ и 100 денари на западната трибина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.