Министерството за култура и Министерството за странски инвестиции биле понудени на вчерашната средба на лидерите на ДПА и Беса, Мендух Тачи и Африм Гаши со премиерот Зоран Заев, пишува Лајм. ДПА и Беса по одржувањето на состаноците на партиските тела треба и официјално да соопштат дека стануваат дел од владината коалиција на СДСМ и ДУИ.
Денеска на пладне во салата на општина Тетово ќе се одржи централното собрание на ДПА на кое треба да се официјализира влегувањето на оваа партија во извршната власт. Неофицијално, ДПА ќе го раководи Министерството за странски инвестиции, а кандидат за тоа место е Бардил Даути, поранешен пратеник на оваа партија и кандидат за градоначалник на Тетово.
Актуелен прв човек на ова министерство е Рамиз Мерко од ДУИ.
Се очекува и Беса на Африм Гаши наскоро да соопшти дека станува дел од владината коалиција и дека ќе го води Министерството за култура. Актуелен министер за култура е Роберт Алаѓозовски од СДСМ.
Освен тоа, премиерот Заев на Тачи и на Гаши им ги ветил и сите заменички и директорски места што ги имаше Алијансата за Албанците која веќе не е дел од владината коалиција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
