„Македоника литера“ го објави романот „Писателот оддалеку“ на Владан Матијевиќ

Друштвото за издавачка дејност „Македоника литера“ од Скопје неодамна го објави романот „Писателот оддалеку“ на еден од најнаградуваните и најафирмираните современи српски писатели Владан Матијевиќ, во превод од српски јазик на Ленче Тосева. За овој роман Матијевиќ е добитник на наградата „НИН“ за 2003 година.

„Писателот оддалеку“ е пародичен, ироничен, зајадлив, сурово реалистичен роман. Во него авторот си поигрува со романескните конвенции, се потсмева со писателот кој пишува роман за да ја добие наградата за роман на српската фабрика за шеќер. Но се поигрува и со постмодерните дискурси на раскажување. Тоа е приказна за писателот шарлатан кој се бори да се прослави како писател, а тоа исмевање всушност е и потсмевање на масовното „штанцање“ романи, на ароганцијата на читателите и на суетата на писателите. Главниот лик во романот е српскиот писател Џони Глинтиќ, кој зад гротескните кулиси за време на бомбардирањето и избегнувањето на мобилиза­ци­ја во 1999 година, пишува роман, со намера да ја добие углед­ната книжевна награда. Оваа пародија за пишувањето роман за награда отсликува многу реални квазикнижевни и квазииздавачки ситуации.

Владан Матијевиќ (1962, Чачак, Србија) е најна­градуваниот српски писател во 21 век – добитник е на нај­ви­со­ките книжевни награди во својата држава. По образование е инженер технолог, а осумнаесет години работел во фабрика за базна хемија. Без поголеми книжевни претензии, во осумде­сеттите години на минатиот век почнал да пишува поезија, но откако во 1991 година ја објавил својата прва поетска книга (што самиот го смета за свој пресвртен настан), посериозно се занимава се литературата и подоцна почнал да пишува и проза. Ги објавил книгите со песни Не нарушувајќи го распад­на­тото (1991) и Самосведување (1999), книгите со раскази Прилично мртви (2000, Андриќева награда) и Пристаништа (2014), романите Вон контрола (1995), Р. Ц. Неминовно (1997 и 2017 – нова верзија), Часови на ра­доста (2006) и Писате­лот оддалеку (2003, награда „НИН“), Многу малку светлина (2010, награ­да „Меша Селимовиќ“), Средби под необични окол­ности (2016), драмите Жилави парчиња (2009), есеите Мемоари, амнезии (2012)…

Повеќето негови книги се реиздавани. Писателот одда­ле­ку има четири изданија на српски јазик. Романите му се преве­ден­и на неколку јазици – француски, германски, шпан­ски, ита­лијански… Досега на македонски јазик му се објавени романите Часови на радоста (издание на „Македоника литера“) и Многу малку светли­на. Некои негови раскази се пре­ве­дени на десетина јазици. За неговото творештво се напи­ша­ни голем број критики. Снимени се и два докумен­тарни филма.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.