На површина од 4.500 метри квадратни со изградени тобогани, лизгалки, базен за деца, базен за возрасни, шанкови во вода, лежалки, стејџ, административна зграда со ресторан, кафе-барови, санитарни јазли, туш кабини, соблекувални и прва помош, градот под Марковите кули ја доби новата летна атракција – Аква Парк.
-Присуствуваме на еден од поубавите приватни проекти на фирмата Салида и хотелот Салида, поточно на фамилијата Горгиоски тоа е Аква паркот каде со помош на Локалната самоуправа, со промена на генералните и деталните планови овој проект беше ставен и во програмата на ЛС како примарна инвестиција која ќе се инвестира во овој период, навистина е еден интересен проект кој што многу ќе значи за развојот на спортот, забавата како и за развојот на туризмот во градот, посочи градоначалникот Ристески во својата изјава.
-Прилеп доби Аква парк еден од помодерните во Македонија, пред се е чест за сите прилепчани и за целиот регион. Аква паркот располага со тобогани, базен за деца, базен за возрасни, шанкови во вода…, имаме подготвено забава како за помалите така и за повозрасните, а цената за користење на Аква паркот ќе чини 150 денари, посочи Ице Горгиоски сопственик на Аква Паркот.
Прилепчани со нетрпение ја очекуваат новата атракција, местото за забава и разладување во летните горештини.
-Пресреќни сме што Прилеп доби Аква парк, ќе можеме да го користиме со внучињата. Ќе доаѓаме на ноќно капење и забава овде, посочија помладите.
Аква паркот овозможи нови работни места, за лица кои се ангажирани во угостителските објекти, кафе-баровите и ресторанот, има редарска служба и просторија за давање итна медицинска помош.
Објектот поседува и стандардизирани машински сали и современ систем за филтрација на водата.
извор:Шеталиште.мк
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
