Роберт Алаѓозовски, место нова инвестиција во културата, брка луѓе од работа, изјави денеска на прес-конренцијата Дарко Костовски од ВМРО ДПМНЕ.
– Според него владата на СДС не е реформска туку антиреформска. Еден од првите проекти на министерот за култура Роберт Алаѓозовски, не е некоја нова инвестиција во културата, ниту пак некоја нова театарска претстава, туку доследно спроведување на политиката на Заев за бркање на луѓе од работа – истакна Костовски.
Според Костовски, Алаѓозовски исто како Заев пред камери зборува едно, а во министерството работи сосема друго.
– Тој вчера во дебатна емисија пред целата јавноста рече дека од министерката Елизабета Канческа-Милевска наследил професионален тим, со кој професионален тим одлично соработувал, а пред само неколку дена ги раскинал договорите за вработување на тројца вработени од министерството, без никакво објаснување. Алаѓозовски и СДС работат спротивно од она што јавно го ветуваа пред граѓаните за време на изборната кампања, дека нема да вршат притисок врз вработените во администрацијата, дека ќе го почитуваат на професионалниот кадар во администрацијата и дека нема да бркаат од работа – рече Костовски.
Според членот на ВМРО ДПМНЕ, СДС не издржал ни 10 дена власт пред да си го покаже вистинското лице.
– Бркањата на административците од работа, најавено од страна на Заев уште во Валандово, по принципот сите ќе ги избркаме и ќе влеземе тимски од чистачка до министер, почна со реализација и тоа е евидентно! Ова е вистинското лице на СДС кое го знаеме од минатото, уривањето, блокирањето, застоите на државните и општествени текови и процеси се нивна главна одлика, бркањето на луѓе од работа, за на нивно место да инсталираат свои партиски послушници и потрчковци е нивна карактерна особина – смета Костовски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
