Идентификуван напаѓачот во метрото во Санкт Петербург

Вчерашниот бомбашки напад во метрото во Санкт Петербург, при кој загинаа најмалку 11 лица, а 51 се ранети, го извршил бомбаш-­самоубиец, кој е идентификуван како Акбаржон Џалилов, роден во Киргистан во 1995 година.  Киргистанскиот државен комитет за национална безбедност денеска соопшти дека Џалилов е руски државјанин, по потекло од градот Ош во јужен Киргистан.

Претходно, руските медиуми, повикувајќи се на полициски извори, јавија дека бомбашот­-самоубиец е идентификуван како „23-­годишен маж од централна Азија“, кој бомбата ја внел во метрото во својот ранец. Некои руски медиуми, пак, објавија дека напаѓачот е идентификуван како Максим Аришев (21), кој е државјанин на Казахстан.

Меѓутоа, заменик-директорот на казахстанскиот Комитет за национална безбедност, Ниргали Билисбеков, ги дементираше ваквите тврдења, нагласувајќи дека напаѓачот од Санкт Петербург „е роден во централна Азија, но не е од Казахстан“.

Руските медиуми информираа дека полицијата при преглед на безбедносните камери претходно регистирала едно лице, за кое постоел сомнеж дека можеби е бомбашот-самоубиец, но тој набрзо се пријавил во полициска станица, отфрлајќи каква и да било поврзаност со нападот. Како што јави ТАСС, руската полиција синоќа издаде потерници по две лица поради сомнеж за поврзаност со експлозијата во метрото во Санкт Петербург.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.