Утревечер, (среда) 15 март, со почеток во 20 часот, во галеријата при МКЦ во Скопје ќе се одржи промоцијата на новиот, втор по ред роман на Давор Стојановски, насловен „Собирачи на пепел“, информираат од издавачката куќа „Или-или“.
Книгата ќе ја претстави поетот, преведувач и критичар, Душко Крстевски низ разговор со авторот. Инаку, се работи за 140 издание во популарната едиција „ПРОаЗА“ на издавачката куќа „Или-или“, која практикува да ги издава ракописите на новата генерација на македонски автори, меѓу кои спаѓа и Стојановски, чиј прв роман, „Ненасловена месечева соната“ (2013), наиде на одличен прием кај читателската публика. Илустрацијата на корицата на новата книга ја изработи Марија Смилевска, а за дизајнот на книгата беа задолжени brigada.mk.
Давор Стојановски (1987, Скопје) е писател, поет, преведувач и музичар. Магистрира на Филолошкиот факултет во Скопје. Неговите дела се застапени во домашни и во странски антологии. Неговиот дебитантски роман „Ненасловена месечева соната“ (2013, Или-Или) влезе во потесниот круг за наградата Роман на годината на „Утрински Весник“.
За книгата, проф. д-р Весна Мојсова-Чепишевска потенцираше:
„Собирачи на пепел“ од Давор Стојановски е роман кој се совпаѓа со светскиот тренд на обновување на фактографската и реалистичната книжевност. Но тој е, истовремено, и едно типично ново егзистенцијалистичко писмо, кое македонската книжевна сцена го чека уште од времето по појавата на „Кратката пролет на Моно Самоникот“ на Димитар Солев. Моно на Солев еве конечно доби свој наследник во Јаков на Стојановски. За разлика од претходниот роман, приказната во овој се случува во Македонија, поточно во Скопје. И без никакво претерување може да се рече дека Јаков на Стојановски е всушност македонскиот Улис, поточно македонскиот Леополд Блум (38 годишен добавувач на огласи во весници), а во добар дел при скитањето во пределите на своето сеќавање израснува и во македонскиот Антоан Рокантен на Сартр. Со тоа, „Собирачи на пепел“ ги отвора вратите за темите на денешнината и тоа за вдоменоста и бездомноста, за чувството на недостиг, за чувството на осаменост покрај сите оние познати и непознати луѓе околу себе, за стравот од блискост, за потребата од далечност со своите и туѓите, за… “
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
