Во Кочани протестен марш „За заедничка Македонија“

Граѓани на Кочани и поддржувачи на „За заедничка Македонија“, 10-ти ден протестираат низ улиците на Кочани против редефинирањето на државата и воведувањето на албанскиот јазик за втор службен јазик.

– Македонија и Македонците имаат еден и единствен јазик, македонскиот кој не го даваме. Ќе се бориме за зачувување на унитарноста на државата и на македонскиот јазик за кој во минатото се бореше и нашиот Крсте Петков Мисирков, основоположникот на македонскиот јазик. Токму затоа вечерва одовде од Кочани им порачуваме на сите оние кои сакаат да го воведат албанскиот јазик за втор службен дека нема да успеат во тоа. Македонскиот јазик е светост за сите нас Македонците кои живееме во Македонија или сме раселени низ светот, порача Доне Донев, професор по литература и автор и изведувач на монодрамата за Крсте Петков Мисирков.

Мирниот протест на граѓаните на Кочани и вечерва се одвиваше по однапред утврдена маршрута од градскиот парк, низ улиците долж кочанската река, а заврши пред споменикот на Никола Карев во паркот на револуцијата.

Според организаторите, протестот „За заедничка Македонија“ ќе продолжи и утревечер, со најава за помасовно учество на граѓаните на Кочани и соседните општини Зрновци и Чешиново – Облешево.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.