Протестен марш за поддршка на иницијативата „За заедничка Македонија“ вечерва по седми пат се одржа и во Неготино.
Пред присутните се обрати Методи Митрев, долгогодишен новинар, кој, меѓу другото рече дека многубројни жители на градот и населените места учествуваат на овие протести, изразувајќи го на тој начин своето несогласување со платформата изготвена во друга држава. За неа тие сметаат дека е во насока на разнебитување на македонското ткиво.
– Впрочем, како поинаку и би се протолкувале залагањата за целосна двојазичност во Република Македонија, преговарања за менување на химната, знамето и на крај името на нашата држава. Токму затоа категорично сме против Тиранската платформа потпишана постизборно во друга држава, бидејќи излегува од рамките на Охридскиот договор, нагласи Митрев.
Притоа додаде дека евентуалното реализирање на точките предвидени во неа, води кон промена на Уставот, што ќе значи бинационално редефинирање на Република Македонија.
– Македонија има свој Устав, кој мора да се почитува, има свој јазик и унитарност, кои претставуваат столб за граѓаните кои живеат во неа. И токму затоа граѓаните се едногласни дека нема да се дозволи загрозување на унитарноста на Република Македонија. Нема да се дозволи промена на химната, знамето и државниот грб, народот нема да дозволи некакви туѓи платформи да влијаат на нашата и на иднината на нашите деца – рече Митрев.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
