Несторовски: Долга е сезоната, сите во Палермо веруваме во опстанок

Илија Несторовски му даде гол и на Наполи, кој не го крие интересот за него во летниот преоден рок. Ударот со глава по центаршутот на Рисполи по само шест минути беше добра подлога за Палермо на дебито на новиот тренер Лопез да освои голем бод на гостувањето на „Сан Паоло“ во Неапол.

– Среќен сум заради овој важен бод против голема екипа каква што е Наполи. Бевме умешни да не им дадеме многу простор на домаќините. Тоа е резултат на голема жртва и многу трчање. Драго ми е за голот, но уште поважен е бодот. Не е многу важно кој постигнува голови. Сега треба само да продолжиме вака, мислам дека сме на прав пат. Сите во клубот веруваме во опстанокот, има уште многу натпревари до крајот. Ако го победиме Кротоне на домашен терен, ќе направиме голем чекор напред. Оваа недела треба добро да се подготвиме, мечот в недела ни е многу важен. Против Кротоне сакам полн „Ренцо Барбера“, ни треба поддршката на гледачите – заврши Несторовски.

Нашиот репрезентативец со осум постигнати гола е прв клупски стрелец, а полека ја руши и бариерата и постигнува голови и против најсилните екипи во лигата. Палермо смени неколку тренери и не поврза три меча без пораз од почетокот на сезоната.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.