Александар Велиновски: Подмладениот состав на СДВ е со многу рафиниран вкус и изградени критериуми

Шестата Скопска недела на дизајн (Skopje Design Week) почна синоќа и ќе трае до 27 ноември во Центарот за дизајн и иновации „Јавна соба“ под мотото „Blooming Makers“. Целта на одржувањето на СДВ е да се поддржат локалните дизајнери во освојувањето на регионалниот и интернационалниот пазар и да ги охрабрат за повидливо присуство на домашниот пазар.

Фокусот ќе биде ставен на главната изложба на која се претставуваат 18, главно, млади дизајнери и дизајнерски студија кои, како што најавија организаторите, храбро, мудро и креативно се борат за своето место на пазарот.

Оваа година СДВ е со нова, женска свежа енергија, најави Александар Велиновски, директорот на „Јавна соба“ – Центарот за дизајн и иновации каде што се одржува втора година по ред СДВ и директор на Неделата на дизајн во Скопје.

– Овогодишниот тим на СДВ бил дел од минатите изданија на фестивалот, но сега е доволно зрел да може да ја понесе и одговорност и да чекори самостојно. Многу е добро што го сакаат фестивалот и веруваат во него – вели во интервју за „Република“ Велиновски.

Што очекувате да донесе новата женска енергија во годишнешното издание на Неделата на дизајнот во Скопје?

ВЕЛИНОВСКИ: Ја гледам таа женска енергија многу јасно сега кога сѐ е наместено и спремно за судир со публиката, а истата енергија ја почуствувавме од самиот почеток, ја препознав и ја мотивирав. Се работи за женска современа естетика и педантност во работењето. Подмладениот состав на  СДВ е со многу рафиниран вкус и веќе  цврсто изградени критериуми. Овогодишниот тим на СДВ бил дел од минатите изданија на фестивалот, но сега е доволно зрел да може да ја понесе и одговорност и да чекори самостојно. Многу е добро што го сакаат фестивалот и веруваат во него.

Дали во годинешните изложувачи на СДВ има дизајнери кои првпат почнале да ги развиваат своите идеи на некои од поранешните изданија на СДВ а денес настапуваат самостојно?

ВЕЛИНОВСКИ: Има и такви случаи меѓу овогодинешните изложувачи. Бранка Данчевска која што била дел од работилниците на СДВ,  сега се појавува во една здружена форма под брендот „Форми“. Кирче Стојоски е дел од најголемата работилница за дизајн на мебел на „Јавна соба“ во 2013 година,  и оттоггаш па наваму секоја година настапува самостојно под сопствен бренд.  Овие брендови како и многу  други се наша гордост, многу се радувам кога говорам за нив, тоа се деца на СДВ, тоа се генерации со кои цела нација ќе се гордее!

Кога ќе погледнете позади себе сиве овие шест години сте директор на СДВ и во непосреден контакт со сите дизајнери, дали може да кажете дека постои македонски дизајн?

ВЕЛИНОВСКИ: Во 2011 година кога започнавме со СДВ јавно изјавив, дека кога логото на фестивалот ќе биде 11:30 часот ( како што е оваа година) ќе почнеме да зборуваме за македонски дизајн. За појаснување за читателите СДВ започна со логото 11:55ч. и саатот секоја година се враќа назад – го враќа времето кое ни е потебно за развој на дизајнот за да одиме напред. Искрено, постои македонски дизајн, поконкретно македоснки продукт дизајн. Јас како директор на „Јавна соба“ – дизајн центар го гледам тоа, бидејќи секојдневно се судрувам со истиот. Луѓето се уште не го препознаваат бидејќи не е масовно застапен. Побарувањето за дизајн производи е се уште на многу ниско ниво, а тоа доаѓа од степенот на образование на пазарот. Под образование мислам на дизајн образование, кое ние, дизајн фелата, треба да го имплементираме. Но, тоа е долг процес, како и секое формално или неформално образование.

Што е она што посетителите не смеат да го пропуштат на годинешниот СДВ?

ВЕЛИНОВСКИ: Оваа година на женското издание на СДВ не смее да се пропушти буквално ништо. Свежи, нови идеи, одлични презентации. Изложбите се врвни, и како поедини предмети и како целокупна поставка во простор. Предавањата се исклучително корисни за деловниот свет, производителите и дизјанери. За работилниците можам да говорам откако ќе ги видиме резултатите. Музичката програма никој пат не била подобра, врвни бендови и ди-џеи од целиот регион. Ќе има кулинарски перформаси и детски креативни работилници.

Што е новитет оваа година?

ВЕЛИНОВСКИ: Оваа година воведени се наградите за најдобар студенски производ, најдобар млад бренд и најдобра изложба. Со ова се надеваме дека ќе се даде посилен ветар во грбот на компаниите и дизајн заедницата.

Дали веќе го подготвувате следното издание на СДВ? 

ВЕЛИНОВСКИ: Рано е се уште! Потребно е да  се направи добра анализа  на сработеното, па се оди понатаму.

Александра М. Бундалевска

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.