| четврток, 6 декември 2018 |

„Пастело“ е избран за Најдобар млад бренд на Неделата на дизајн во Скопје

„Пастело“ е избран за најдобар млад бренд на Неделата на дизајн во Скопје која заврши синоќа. Оваа награда се доделува вторпат, а за неа одлучува четиричлено жири.

– Критериумите секогаш варираат, од креативност, до употребливост на брендот, неговата идна вредност во контекст на развој, можен пласман и развој. Оваа година го избравме „Пастело“, дефинитивно нешто кое претставува финализиран производ кој допрва ќе зема замав на пазарот во Македонија, но и надвор – изјави Александар Велиновски директор на Неделата на дизајн во Скопје.

Покрај основниот модел на Неделата на дизајн во Скопје кој претставува епицентар на сите збиднувања во контекст на дизајнот воопшто, експо елементите, вмрежувањето, создавањето на еден поинаков контекст на секој производ, културолошкиот сегмент и забавата, има уште еден дополнителен сегмент кој само дава потврда за тоа што е постигнато до моментот на изложување.

„Пастело“ е млад бренд во Македонија, мала компанија составена од ентузијасти од Куманово. Инспирацијата потекнува директно од „звукот на материјалите”, спојот помеѓу дрво, челик и јаже. Финалниот производ е безвременски одржлив дизајн на елементи за осветлување и мебел.

Градење на еден бренд значи вбризгување на еден вид персоналити инженеринг преку кој тој добива свои особини и на тој начин автентично комуницира со својата публика. Оттука, ПР агенцијата „Навигаторс“ за „Пастело“, обезбедува едногодишна консултантска поддршка во областа на маркетингот, бесплатна комуникациска стратегија и едномесечна кампања.

Со оваа последна активност, заврши седмото издание на Неделата на дизајн во Скопје каде земја во фокус беше Унгарија.

Наредното, осмо издание, веќе се подготвува, а земја во фокус за 2018 година е Германија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.

Top