Првата меѓународна конференција за безбедност на сообраќајот на патиштата, на тема: „Управување со безбедноста на патниот сообраќај во Југоистична Европа-предизвици и насоки за дејствување“ започна денес во Скопје. На Конференцијата присуствуваа претседателот на РСБСП, Стојче Стаменковски, заменик на претседателот на Владата на РМ, Владимир Пешевски и претседател на Координативното тело за безбедност на сообараќајот на патиштата, дополнителниот заменик-министер во МВР Оливер Андонов, и претседателот на Република Македонија, Ѓорѓе Иванов.
Конференцијата ја отвори Иванов кој во своето обраќање пред присутните истакна дека секој учесник во сообраќајот има право да биде безбеден и да се движи безбедно, но и честопати забораваме дека тоа право подразбира и лична одговорност на секој учесник во сообраќајот, односно зависи од триаголникот на правото, одговорноста и почитувањето.
-Ниту нови патишта, ниту нови закони, ниту повисоки казни, нема да ја намалат смртноста на патиштата ако не работиме на развивање на сообраќајната култура. Култура и етика што ќе се градат и пренесуваат преку семејствата, училиштата, автошколите, сè додека не прерасне во општоприфатена навика. За да го постигнеме сево ова неопходен ни е холистички пристап и затварање на кругот на одговорноста за тоа кој, кога и за што е одговорен, истакна Иванов кој потенцираше дека оваа Конференција за безбедност во сообраќајот ќе го израмни патот за да стигнеме до целта, а целта не е само да се постигне европскиот просек.
-Целта е да не се плашиме кога нашите деца одат на училиште, кога нашите млади се враќаат од забави, кога нашите блиски патуваат. Целта е нашите возачи да не бидат закана за сопствениот и за животите на другите луѓе. Целта е да престане да се лее човечка крв по нашите балкански патишта, додаде Иванов.
Стаменковски, во своето излагање, посочи дека потребата од регионална дискусија за регионални иницијативи и потреба од изнаоѓање на унфицирано решение е главната причина поради која РСБСП ја организира Конференцијата.
-Оваа Конференција претставува одлична можност заеднички да продолжиме да го градиме системот за управување со безбедност на сообраќајот на патиштата во Југоисточна Европа. Загубените човечки животи, бројните семејни трагедии и човечките судбини кои секојдневно се испишуваат на патиштата во земјите од регионот и пошироко, се поразителен факт кој треба да нè загрижува сите. Затоа, очекувам на Конференцијата, сите поединечно да ги изнесат своите погледи и ставови, за тоа, што е направено и што треба да се направи во наредниот период, од аспект на секоја одделна институција и организација и од аспект на секоја земја поединечно, а во поглед на политичките, безбедносните, правните, организационите, техничките, научните, социолошките и другите елементи кои влијаат врз безбедноста на сообраќајот на патиштата, истакна Стаменковски.
Тој понатаму потенцираше дека од овој научен настан треба да излезат конкретни препораки за идните активности на повеќе надлежни институции и организации, конкретни препораки кои треба да бидат преземени на национално ниво, но и препораки за тоа како заеднички да дејстуваме во наредниот период за да се намалат сообраќајните незгоди со фатални последици на патиштата во Југоисточна Европа.
Претседетелот на Координативното тело за унапредување на безбедноста на сообраќајот на патиштата Пешевски, кој во изминатиот период даде силна поддршка за спроведувањето на јавните кампањи за подигање на јавната свест за одговорно учество во сообраќајот, во своето обраќање истакна дека управувањето со безбедноста на сообраќајот на патиштата е еден од високо поставените приоритети и цели на Владата на Република Македонија, што гарантира дека во наредниот период ќе бидат применети сите расположливи ефективни мерки и ќе биде ангажиран целокупниот институционален и општествен потенцијал за намалување на последиците од сообраќајните незгоди.
Андонов, посочи дека изминативе години министерството самостојно, но и како партнер било дел од многу кампањи посветени на сообраќајот.
-Нашето делување е фокусирано на повеќе нивоа почнувајќи од децата и младите, па се до интензивирањето на сообраќајните контроли низ целата држава. Иако ни се забележува на ригорозноста, ние сепак сме одлучни во нашиот пристап за подигање на безбедноста во сообраќајот на едно високо ниво и притоа јасно демонстрирајќи дека нема никаква толеранција за алкохолизираните возачи, за несиправните возила по коловозите, за непочитување на прецизните сообраќајни правила и прописи. Таквиот пристап спасува од ненадоместливи трагедии и големи материјални штети, потенцираше Андонов.
Со свое обраќање на присутните гости им се обратија и претседателите на меѓународните организации за безбедност во сообраќајот, Антонио Авеносо (ETSC) и Бенацер Булеажул (PRI).
Откако ќе се усогласат ставовите меѓу земјите, истите ќе бидат преточени во „Декларација за интензивно дејствување и засилена соработка за помалку повредени и загинати на патиштата во Југоисточна Европа“ која ќе биде усвоена на крајот на Конференцијата.
На Конференцијата присуствуваат претставници од сите надлежни институции од земјите од регионот, претставници од науката, просефори, аналитичари, експерти, претставници од релевантни меѓународни организации и здруженија сè со цел размена на ставови, мислења и сугестии за ефикасно управување со безбедноста на патниот сообраќај во Југоисточна Европа. По свеченото обраќање Конференцијата продолжува со панел дискусија, на која обраќање ќе имаат Државниот секретар на МВР, Сања Димитриевска и претставници од водечките тела за безбедност во патниот сообраќај, а во понатамошниот дел збор ќе имаат и реномираните професори од земјите учеснички.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
