Тренерот на ФК Брегалница, Јуксел Јесилова вчера во полиција пријавил дека бил нападнат од Иле Колев. Според пријавата во МВР нападот се случил на магистралниот пат Кочани-Штип кај селото Крупиште, по што двајцата завршиле в болница.
Полицијата денес информира дека додека Јесилова се движел со автомобил „порше“, кое го управувала неговата сопруга каде како сопаник било и деветгодишно дете, пред нив се движел „мерцедес“, кој постојано ја намалувал брзината и по патот се движел лево-десно не дозволувајќи му на „поршето“ да го престигне, а го управувал претседателот на фудбалскиот клуб.
Кај селото Крупиште „мерцедесот“ му го попречил патот на „поршето“, по што од автомобилот излегол поранешниот претседателот на ФК Брегалница, Колев кој извадил метална прачка и се упатил кон возилото каде што се наоѓал Јесилова. Тренерот излегол од автомобилот, па Колев го удрил со металната прачката во пределот на раката и на ногата. Во обид да се одбрани, како што информираат од полицијата, настанала турканица по што двајцата паднале во каналот што се наоѓал покрај патот.
Јесилова и Колев биле пренесени в болница каде им се констатирани телесни повреди. Од полицијата додаваа дека со И.К. е извршен разговор во полициска станица и се работи на целосно расчистување на случајот.
Неофицијално, причина за нападот се многубројните несогласувања во фудбалскиот клуб.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
