Германската канцеларка Ангела Меркел изјави дека Европската унија мора да склучи спогодба за емигрантите и со африканските држави, како што се Египет и Тунис, на идентичен начин како што направи со Турција, јави „Ал Џазира“.
Меркел изјави дека мора да се издвојат повеќе пари за успешно соочување со основните причини за миграцијата и додаде дека е исклучително важно „да се спречи повторување на ситуацијата од минатото лето“, кога бегајќи пред војната и сиромаштијата стотици илјади луѓе од земјите на Блискиот Исток ја обележаа најголемата европска бегалска криза по Втората светска војна.
-Важно е на африканските држави да им понудиме перспектива за иднината. Или мораме да ги пуштиме луѓето да дојдат овде или мораме да се соочиме со основните причини за миграцијата, за луѓето да сфатат дека со останувањето во своите домови имаат некоја перспектива – рече Меркел.
Таа не изнесе конкретни детали за потенцијалната спогодба меѓу ЕУ и африканските земји, кои, за разлика од Турција, не се кандиди за членство во Унијата. За потребата од склучување спогодба со африканските земји последен пат се зборуваше на самитот Г20 во Кина. По изборниот пораз во Берлин, Меркел призна дека направила грешки кај некои одлуки донесени во текот на бегалската криза.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
