Кирил Лазаров, најдобриот македонски ракометар, си заминува од шпанскиот клуб Атлетико Мадрид. Оваа вест тој ја објави на својот портал. Тој сѐ уште не соопштува каде ќе ја продолжи кариерата. Во македонските медиуми се шпекулираше дека преговарал и со скопски Вардар про.
– Можам да потврдам дека по завршувањето на оваа сезона нема веќе да настапувам за Атлетико Мадрид. Имав три успешни сезони и многу радости во црвено-белиот дрес. Наскоро ќе ја знам мојата иднина и ќе го соопштам името на мојот нов клуб – кратко потврди Лазаров околу шпекулациите за наредната сезона.
Еден од петте најдобри светски десни бекови заминува од Атлетико Мадрид поради намалувањето на буџетот на екипата, што е причината за напуштање на клубот и на уште неколку други ракометари.
Лазаров во три сезони освои седум трофеи со Атлетико на Талант Душебаев и играше уште две финалиња на Лигата на шампионите. Најчесто го подигаше трофејот од Купот на кралот, дури трипати, по еднаш го освои и Купот на АСОБАЛ, Суперкупот ан АСОБАЛ и ова лето ИХФ Суперглоуб во Доха.
Во сите три сезони беше најдобар клупски стрелец во АСОБАЛ лигата и во Лигата на шампионите, а минатата година и втор стрелец со еден гол помалку зад Микел Хансен.
Според шпекулациите, Лазаров би требало да продолжи во Германија и тоа во екипата на Хамбург, која од поодамна го мерка нашиот репрезентативец. Но, не е исклучено тој да замине и во некоја од источните земји каде што би имал многу поголеми примања.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
