Машката младинска репрезентација на Македонија денеска го почнува настапот на ЕП во Данска за ракометари до 20 години. Норвешка во денешниот прв натпревар (17.45 ч.) ќе биде првиот тест за избраниците на Александар Јовиќ, на овој шампионат во групата во Колдинг во која се уште и селекциите на домаќинот Данска и на Холандија.
– Во многу тешка група сме. Норвешка по рејтинг е фаворит во првиот дуел, но, ако успееме да изненадиме тоа ќе биде огромен успех за нас. Оваа генерација досега не играла во полн состав, така што ќе бидеме на некој начин непознаница за Норвежаните и тука ја гледам нашата шанса. Имаме квалитет, добро работевме и ако го одиграме тоа, ќе може да се надевема на поволен резултат – вели в.д. селекторот на македонската репрезентација до 20 години, Александар Јовиќ пред дуелот со Норвешка.
По подготовките во Скопје и во Маврово, младинците изминатите две седмици се подготвуваа во Рогла, Словенија и во Умаг, Хрватска каде одиграа и по два контролни натпревари со домашните селекции и максимално подготвени го очекуваат стартот на ЕП во Данска.
По подолга пауза поради повредата на коленото, на теренот се враќа Марко Нелоски кој заедно со Филип Талески, Филип Кузмановски и Мартин Велковски се предводници на оваа генерација и се нови надежи во претстојниот процес на подмладување на сениорскиот состав.
– Целта е преку ова младинско првенство да се стекне искуство и да се добијат неколку ракометари за А селекцијата – истакнува Јовиќ.
Според распоредот на натпреварите во групата во Колдинг, Македонија денеска (17.45 ч.) ќе игра против Норвешка, утре (20 ч.) е дуелот со Данска, а последниот натпревар од групата против Холандија е во недела (18 ч.). Првите две селекции од групата продолжуваат во осминафиналните групи, а другите две селекции ќе разигруваат за пласман од 9 до 16 место.
Сите натпревари на ЕП (У20) може да се следат во живо на следниот ЛИНК.
Состав на македонската репрезентација за ЕП во Данска: Мартин Томовски, Никола Даниловски, Марио Танкоски, Томислав Јагуриновски, Александар Димовски, Филип Арсеновски, Мартин Велковски, Марко Нелоски, Стефан Трпчевски, Димитар Димитриоски, Андреј Маркудов, Филип Талески, Филип Кузмановски, Горан Крстевски, Давор Палевски, Мице Шилегов.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
