Средствата за владино рекламирање ќе се распоредуваат рамномерно и транспарентно, се предлага во предлог-законот на Министерството за информатичко општество и администрација, а кој Владата на Македонија го усвои на седница во петокот.
Според предлог-законот, сите медиуми ќе добиваат пари од владиниот колач. Средствата ќе се распределуваат на сите медиуми. За предлог-законот ќе следува широк консултативен процес.
Донесување нов закон за владино рекламирање е еден од итните реформски приоритети кој произлегува од насоките добиени од ЕУ за регулирање на начинот на распределба на буџетот за владините кампањи.
-Да се воспостават строги правила за владино рекламирање засновани на транспарентни, објективни и недискриминациски критериуми, да се обезбеди целосна транспарентност на владиното рекламирање (не само во однос на трошењето на јавните финансии, туку и во однос на примателите и содржините), да се развие механизам за бесплатни објави кои се навистина од јавен интерес. Правилата во однос на медиумската сопственост и медиумското финансирање да бидат ревидирани со цел да се направат медиумската сопственост и медиумското финансирање потранспаренти, стои во барањето за итни реформски приоритети кои се однесуваат на владиното рекламирање.
Со предлог-законот се адресираат сите 4 точки од овој итен реформски приоритет. Имено, со предлог-законот се пропишуваат правилата за рекламирање, начинот на распределба на средствата за финансирање наменети за закуп на медиумски простор, односно време за јавнофинансираните информативни кампањи во Република Македонија, како и надлежноста на Агенцијата за аудио и аудиовизуелни медиумски услуги за вршење на ex-post контрола на начинот на реализација на јавнофинансираните информативни и рекламни кампањи.
-Во согласностс о предлог-законот, јавните институции се должни да работат јавно и транспарентно и да ги информираат граѓаните за својата тековна работа и своите законски надлежности преку објавување јавни соопштенија до медиумите, преку организирање јавни настани, настапи и други некомерцијални активности, како и преку објавување информативни кампањи на програмата на јавниот радиодифузен сервис.
-По исклучок од правилото, во определени случаи, а заради заштита и унапредување на јавното информирање поврзано со јавниот интерес, јавните институции може да реализираат информативни кампањи со закуп на медиуми, кои мора да се:
- оправдани
- презентирани на соодветен начин
- објективни и политички неутрални
при што прецизно се дефинираат терминините оправдана, презентирана на соодветен начин, објективна и политички неутрална.
Јавниот интерес на кампањите е дефиниран
-Кампањите со буџет од над 100.000 евра, задолжително се објавуваат на сите медиуми (телевизии, радија, регистрирани во регистрите на Агенцијата), а во зависност од целната група и на други медиуми (печатени медиуми, интернет медиуми).
-Распределбата на средства за закуп на медиуми се врши најпрво во согласност со уделите на соодветните пазари, потоа според удел на рамномерна распределба и удел на рејтинг, за на крај според рејтингот (гледаноста, слушаноста, читаноста, посетеноста) на поединечниот медиум.
– На ваков начин се воспоставуваат строги правила за владино рекламирање засновани на транспарентни, објективни и недискриминациски критериуми, и се обезбедува целосна транспарентност на владиното рекламирање(не само во однос на трошењето на јавните финансии, туку и во однос на примателите и содржините).
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
