Патувачката изложба „Ана Франк – Лекции за сегашноста“ денес (10 мај) ќе биде отворена во Кавадарци, во Музеј галерија, во 18 часот. Влезот за изложбата е бесплатен, објави радио „Моф“.
„Ана Франк – Лекции за сегашноста“ претставува збир од триесет и девет изложбени панели, кои носат бројни детали од животот на малата Ана и нејзиното семејство од Втората светска војна. Изложбата е отворена во Македонија во рамки на проектот „Хисторија, Историја, Повјест – Лекции за денес“, а организатори се Младински образовен форум и Куќата на Ана Франк од Амстердам. Во изложбата има и панели креирани посебно за македонскиот контекст, во периодот по Втората светска војна до денес, а се изработени од домашните експерти Мишо Докмановиќ и Бесник Емини.
Она што ја прави оваа изложба поинаква е што водичи за посетителите ќе бидат млади волонтери, средношколци кои поминале обука за да ја раскажат приказната на Ана Франк. Досега има посетено четириесетина земји.
Изложбата во Македонија е изработена и донесена во рамки на проектот „Хисторија, Историја, Повјест – Лекции за денес“ поддржан од Европската Комисија. Проектот има за цел да го покрене вниманието и поттикне дискусија за настаните од блиското минато на Западен Балкан кои се причина за различни поделби и генерирање на конфликти во минатиот век.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
