Во два карневалски дена в сабота и недела на 12 и 13 март, околу 1.500 групни и поединечни маски ќе продефилираат во рамки на јубилејниот 15-ти меѓународен карневал „Прочка 2016“ во Прилеп.
Како што соопшти на денешната прес-конференција Снежана Ристеска, советник за култура при прилепската локална самоуправа Прилеп е подготвен за одржување на јубилејниот меѓународен карневал.
– Ние, од локалната самоуправа, како организатори, заедно со здружението „Мечкари“ сме горди на реномето што го има карневалот кај нас и надвор од земјава. На карневалските денови, в петок од 12 часот во Центарот за култура „Марко Цепенков“ им претходи традиционалната изложба на маски што ги прават учениците од основните и средните училишта. Годинава ја реализираме долгогодишната идеја, в сабота, посебно да биде дефилето на детските маски. Парадата на карневалските учесници до 12 години ќе почне од основното училиште „Кочо Рацин“ во центарот на градот. Како придружни настани се: куклена претстава, маѓионичари, жонглери, акробатска претстава на плоштадот „Методија Андонов-Ченто“ и сето тоа да заврши со заедничка забава, појасни Ристеска.
Главен настан е карневалското дефиле, в недела, од 13 часот, во центарот на Прилеп. Со бројни поединечни и групни маски ќе се претстават домашните и странските учесници.
– Очекуваме над 1.500 учесници во групните маски. Освен од Прилеп и повеќе градови од Македонија, имаме најавено учесници од Србија, Хрватска, од Словенија, Грција, од Албанија, Бугарија и од Италија, изјави Ристеска.
В недела од 19 часот во Центарот за култура ќе има ретроспективна визуелна изложба на спомени за досегашните карневалски случувања низ годините, како и промоција на монографија за Карневалот.
Се очекува на карневалските свечености да присуствува и претседателот на карневалската асоцијација на европските градови, Ван дер Крон.
Од 21 часот, в недела, во хотелот „Липа“ е заедничката карневалска забава со наградените маски од годинашниов меѓународен карневал.
Според градоначалникот на Прилеп, Марјан Ристески карневалот е одраз на вековната традиција на маскирање за верскиот празник „Велики Поклади-Прочка“ и со долгата традиција на Мечкарите, како заштитна маска на карневалот.
– Традициите се вековни, а Прилеп организирано го прави карневалот 15 години, од кои последните десет како членка на Европските карневалски гардови. Ќе имаме многу маски-учесници од земјава, Балканот, од Европа. Угостителските објекти и хителите се веќе организирани, резервирани се капацитетите за гостите. Советот на општина Прилеп, со одлука, за два часа го продолжи работното време на угостителските објекти. На граѓаните и на гостите им останува со себе да понесат само добро расположение и карневалска маска, вели Ристески.
Според процените на организаторите, локалната самоуправа и здружението „Мечкари“ за време на карневалските денови се очекуваат околу 15 000 посетители.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
