Во мултимедијалниот културен центар „Матица ексклузив“ во Паркот на книгите, на 10 март (четврток) во 19 часот ќе се одржи свеченост по повод 60-годишнината од раѓањето на проф. д-р Стефан Влахов-Мицов. Во оваа пригода ќе биде промовирано неговото најново дело „Творечки дострели во македонски дух“, објавено во рамките на јубилејната програма на „Матица македонска“ од Скопје по повод 25-годишнината од основањето на оваа издавачка куќа. За делото на познатиот научник, книжевник и публицист, беседа ќе одржи проф.д-р Весна Мојсова Чепишевска.
Стефан Влахов Мицов е автор на дваесет книги од областа на филозофијата, историјата, книжевната критика и есеистика. На македонски јазик ги објавил книгите: „Филозофскиот клуч за македонскиот идентитет“, „Вируси за поматени мозоци“, „Хероите и потомците“, „Македонската еманципација на Балканот“, „Држава како се гради и брани“, „Филозофија на балканскиот пекол“ и „Балканска психологија-државници и марионети“.
Во 2006 година беше добитник на почесното Рациново признание,а во 2011 година ја доби меѓународната награда „Духовен воин“ на Македонските духовни конаци.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
