Ако секој работи напорно и игра според правилата, веруваме дека изборите на 5 јуни може да бидат веродостојни и да ја придвижат Македонија напред во надминување на политичката криза, изјави амбасадорот на САД, Џес Бејли, откако политичките партии договорија пролонгирање на изборите од 24 април на 5 јуни.
Одговорајќи на новинарско прашање, што ако некоја од политичките партии ги бојкотира изборите, Бејли рече дека сите партии треба да учествуваат во процесот.
Во врска со реформите во медиумите, американскиот амбасадор напомена дека тие не се клучни само за изборите, туку мора да се спроведат во интерес на целото општество.
– Реформите во медиумите остануваат многу важен дел не само од изборниот процес, туку тие се и една од приоритетните реформи што треба да се спроведат. Како медиумите и медиумската сфера ќе бидат оценети зависи од тоа како ќе ја извршат својата задача, како ќе ги покријат овие многу битни избори. Сите вие потпишавте Етички кодекс и затоа најважно ќе биде како ќе ја завршите вашата работа и да им помогнете на македонските граѓани да бидат информирани – истакна Бејли, кој беше придружуван од европратенкиот Ричард Ховит и од в.д. амбасадорот на Делегацијата на ЕУ во Скопје, Лукаш Холуб.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
