Богатата НБА понуда на еден ден пред нова година во која се одиграа 10 натпревари, ја одбележа само вториот пораз на шампионот Голден Стејт во новата сезона.
Воините за првпат настапија без првата ѕвезда Стефон Кари и беа убедливо поразени на гостувањето кај Далас со 114-91. Кари има мала повреда на ногата и најавено е дека ќе отсуствува само два меча. Далас целосно доминираше во овој меч, а во третата четвртина имаа и огромна предност од 30 поени (83-53). Одличната игра на домаќините беше зачинета со фантастичниот шут за три поени со 52 проценти прецизност и 14 уфрлени топки. Клеј Томпсон слабо се снајде во улогата на лидер постигнувајќи само 10 поени со шут од поле 4/15, а најефикасен во редовите на шампионот беше Кларк со 21 поен. Најдобар поединец на мечот беше домашниот плејмејкер Бареа, кој имаше 23 поени и 6 асистенции, додека грузискиот центар Заза Пачулија оствари дабл-дабл од 14 поени и 15 скокови.
Сан Антонио ја продолжи победничката серија на домашен терен, декласирајќи го составот на Феникс санс со 112-79. Олдриџ беше најефикасен со 21 постигнат поен, Леонард постигна 19, додека Марјановиќ реализираше седум поени, надополнети со 12 скока.
Коби Брајант славеше на својот последен натпревар во кариерата одигран во Бостон, откако лејкерси неочекувано триумфираа на ова секогаш незгодно гостување со 104-112. Брајант оствари дабл-дабл од 15 поени и 11 скока, а најефикасен кај лејкерси беше Џордан Кларксон со 24 поени.
НБА резултати:
Портланд – Денвер 110-103, Сакраменто – Филаделфија 105-110, Сан Антонио – Феникс 112-79, Далас – Голден стејт 114-91, Бостон – ЛА лејкерс 104-112, Торонто – Вашингтон 94-91, Чикаго – Индијана 102-100 (по прод.), Минесота – Јута 94-80, Орландо – Бруклин 100-93, Шарлот – ЛА клиперс 117-122.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
