ИН МЕМОРИАМ – Љубчо Матевски Шкрет (1957-2015)

Денеска по кратко боледување почина Љубчо Матевски, долгогодишниот спортски директор на фудбалскиот клуб Македонија Ѓорче Петров, пренесува спортскиот портал Спортмедиа.мк.

Матевски речиси целиот свој живот му го посвети на фудбалот и на клубот Македонија Ѓорче Петров, каде работеше 35 години. Тој беше инволвиран во сите успеси и падови на клубот, но секогаш макотрпно работеше да го врати онаму каде што припаѓа, а тоа е на врвот.

Секогаш присутен на речиси сите натпревари на „лавовите” било во Четвртата лига, Првата лига, при освојувањето на Купот и шампионската титула, до натпреварите кога Македонија Ѓорче Петров го претставуваше македонскиот клупски фудбал во европските купови како Интертото купот, УЕФА купот и квалификациите за Лигата на шампиони.

Како прв оперативец на клубот беше задолжен за трансферите, ангажирањето тренери и регрутирањето млади таленти, по која е позната фудбалската школа на Македонија Ѓорче Петров. Фудбалски работник, кој сигурно ќе му недостига на својот еден и единствен клуб, но и на македонскиот фудбал воопшто.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.