Во библиотеката „Тане Георгиевски“ во Куманово беше промовиран романот „Рогот на љубовта“ од авторот Божин Павловски.
Павловски изјави дека станува збор за автобиографски роман, кој се случува во средината на минатиот век. Посочи дека романот го опишува ентузијазмот на младите луѓе кои тогаш пројавиле интерес за сопствено издигнување, во периодот кога започнува заминувањето во туѓина.
– Меѓу осумнаесетте романи кои што сум ги создал, овој веројатно е роман што најмногу го сакам бидејќи го откинав од своето рано детство и го работев долго. И англиското издание според тамошната критика кажува дека сум направил добро дело, рече Павловски.
Промоторот Блаже Миневски истакна дека романот „Рогот на љубовта„ е 17. дело на Божин Павловски кое не влегува во циклусот на дела кои ја третираат дијаспората, туку нашето поблиско и подалечно минато.
– Станува збор за приказна за оттуѓување на луѓето од репресија на власта во 50-тите години од минатиот век, рече Миневски.
Додаде дека писателот Павловски е еден од нашите живи класици, кој 50 години е посветен исклучиво на пишување романи. Романот е добитник на наградата на Друштвото на писателите на Македонија „Стале Попов“.
Промоцијата на книгата во кумановската библиотека се реализира во рамки на одбележувањето на „Месецот на книгата“ и е во рамки на одбележувањето на 70 годишниот јубилеј на установата.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
