Во емисијата „Берихт ин Берлин“ на германската телевизија „АРД“ беше прикажана фотомонтажа на која канцеларката Ангела Меркел е забрадена, а во заднина се гледаат минариња.
Ова на социјалните мрежи предизвика бура од најразлични коментари и критики дека телевизијата отишла предалеку и дури негативно ја искористила слободата на медиумите, пренесуваат германските медиуми.
„АРД“ одлучно ги отфрлила сите критики дека таквата форма на изразување може да придонесе пораст на непријателската пропаганда против исламот.
– Се радуваме на критиките и искрено жалиме што нашата претстава за германската канцеларка не ја разбраа сите… Тоа беше во врска со темата на емисијата за вредностите на нашето друштво – слобода на мислење, слобода на медиуми и рамноправност. Секако, со таа слика сакавме да пробудиме внимание и поларизација… – соопштил јавниот сервис „АРД“, нагласувајќи дека тие таквата форма на изразување ја сметаат за легитимна.
Меркел изминатиов период се најде на удар од политичарите дури и од сопствените редови и јавноста во врска со справувањето на проблемот со бегалците.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
