Организираниот транспорт на емигрантите од прифатниот пункт кај Гевгелија до Табановце, според проценките на сите чинители вклучени во справувањето со бегалската криза, се одвива во најдобар ред.
Од УНХЦР велат дека кон прифатниот камп во Гевгелија очекуваат во текот на денот постепено да пристигнуваат емигранти од поголема група од околу 7.000 лица кои се упатиле кон македонко-грчката граница.
За време на викендот, емигрантите се превезуваа само со воз од платформата во Гевгелија до Табановце. Кон границата со Србија и денеска тие заминуваат по железнички пат со редовните и специјалните возови. Според информациите од железничка станица во Гевгелија, изминативе дванаесет часа кон Табановце заминале 1.500 мигранти, а пред малку кон северната граница замина уште еден специјален воз со околу 1.000 мигранти.
Оваа бројка се вклопува и со проценките на меѓународниот Црвен крст, чии активисти велат дека околу 1.600 емигранти до утрово се упатиле од Гевгелија кон Табановце. Бројот на здравствените интервенции е во рамките на нормалата, од 40 до 50 на ден, информираа од Црвениот крст, нагласувајќи дека викендов биле поделени и 2.000 пакети со храна и вода.
Претставниците на УНХЦР оперираат со бројка од околу 3.000 емигранти кои изминативе 24 часа заминале од јужната кон северната граница. Според нив, состојбата на границата е нормална, а прифатниот пункт за мигрантите функционира во најдобар ред. Во последниот бран бегалци кои пристигнале во Гевгелија, најбројни биле бегалците од Авганистан и од Пакистан.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
