Градоначалникот на Охрид, Никола Бакрачески, бара начин како да ги зголеми авионските летови до Охрид. Тој деновиве имал работна средба со извршните директори на „Визер“, претставници од Министерството за транспорт и врски и со претставници на ТАВ.
Бакрачевски барал начин како да се зголеми фреквенцијата на летови на охридскиот аеродром.
– Фундамент на секој развиен регион без кој не може да се замисли економскиот раст и развој, но и она без што во иднина ние не можеме да замислиме унапредување на туризмот во градов е стабилен и континуиран авионски сообраќај. Имавме мошне конструктивни разговори околу можностите и капацитетите на овој регион, за реализација на поголем број летови од охридскиот регион. На иста маса ги седнавме луѓето од компанијата „Визер“, од ТАВ и претставниците од експертската јавност и разменувавме идеи и предлози на кој начин, ние како локална самоуправа, можеме да дадеме наш придонес во субвенционирањето што Владата на Република Македонија го чини изминатиов период во поглед на летовите. Целта е да проработи охридскиот аеродром онака како што треба и мора да работи и на тој начин да ја зголемиме фреквенцијата на летови од овој аеродром, кој понатаму ќе води кон забрзан развој на туризмот, односно привлекување странски инвестиции и економски раст и развој на општината – изјави Бакрачески.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
