Премиерот Никола Груевски изјави дека нема да даде оставка, бидејќи мандатот го добил од граѓаните на Република Македонија на регуларни, фер и демократски избори пред само една година.
– Оставка немам намера да поднесам, ниту пак да прифатам преодна влада. Имам обврска да се справам со ова што го прави Заев, да се справам со ова и да најдам решение Македонија да оди напред. И ќе оди напред, истакна Груевски денеска на гостувањето во вестите на Сител телевизија.
Посочи дека Зоран Заев пет пати му кажал дека материјалите ги добил од странска разузнавачка служба.
– Значи дека е свесен дека некој однадвор го креира ова сценарио. Јас да се повлечам би било кукавички чин, јас ќе се соочам со нападот кон нас и заедно со народот да покажеме дека Македонија не може на ваков начин да биде нападната, Македонија покажува и ќе покаже цврстина, рече Груевски.
Премиерот потсети дека тројца функционери за кои никој нема докажано никаква вина поднесоа оставка. – Тие решија да поднесат оставки за да се види дека немаат никаква вина и сакаат тоа да го докажат без свое присуство и влијание, додаде тој.
– Сега се соочуваме со материјалите кои излегоа во медиумите, а во кои се гледа класично барање на мито од страна на Заев на најмалку тројца луѓе. Тој не се повлекува од функцијата, а тоа јавно го побаравме од него. Од Владата си заминаа луѓе без никаква вина, а тој не го прави тоа кога може да влијае врз сведоците и да го повтори делото. Да беше чист ќе се повлечеше, нагласи Груевски.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
