Менаџерот на Челси, Жозе Мурињо, изјави денеска за англиските медиуми дека неговата екипа има ментална сила за да ја освои титулата во Премиерлигата.
Челси моментално е прв на табелата со 70 бода, седум повеќе од второпласираниот Арсенал и осум од Манчестер јунајтед, но и натпревар помалку.
Екипата на Мурињо треба да освои уште 15 бода до крајот на сезоната за и теоретски да го осигури првото место, пет години по освојувањето на последната титула.
– Менталната сила е многу важна во вакви моменти. На крајот на сезоната се одлучува сѐ, опстанокот, пласманот во Лигата на шампионите и титулата. Можете да бидете фантастични седум-осум месеци, но сега е моментот на вистината. Затоа треба да се биде ментално силен – изјави Мурињо за британските медиуми.
Мурињо додаде дека екипата, и покрај притисокот, мора да биде релаксирана.
– Мислам дека играчите се релаксирани. Кога ги гледам своите фудбалери, гледам играчи кои играат ослободено. Борбата за титулата е најдобрата мотивација – додаде португалскиот стратег.
Челси во следното коло го дочекува тимот на Квинс парк Ренџерс, а до крајот на април на свој терен го дочекува Манчестер јунајтед и му гостува на Арсенал.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
