Светскиот рекет број еден Новак Ѓоковиќ ќе игра во финалето на Мастерсот во Мајами, САД, откако ноќеска во вториот полуфинален меч го совлада домашниот тенисер Џон Изнер со 2-0, по сетови 7:6 и 6:2. Новак е пред шанса да биде првиот тенисер во историјата, кој во три различни сезони ги освоил двата американски мастерси, Индијан велс и Мајами опен.
Во првиот сет Американецот со своите силни сервиси му задаваше многу проблеми на Ѓоковиќ, но сепак во тај-брејкот Србинот беше поуспешен и го доби со 7:3. Во третиот гем од вториот сет Ѓоковиќ за првпат зема гем на противнички сервис, го зачува својот, а веднаш потоа направи уште еден брејк и веќе победникот беше решен.
Противник на Ѓоковиќ во завршниот меч ќе биде Британецот Енди Мареј кој во првото полуфинале го совлада Томаш Бердих во два сета со по 6:4.
Финалето е закажано за утре во 19 часот по средноевропско време.
Вечер со почеток од 19 часот во Мајами ќе се одигра женското финале меѓу домашната тенисерка Серена Вилијамс и Шпанката Суарез Наваро.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
