Министерот за надворешни работи и меѓународен развој на Франција, Лоран Фабиус му се заблагодари на шефот на македонската дипломатија Никола Попоски за пораката со поддршка и солиданост упатена по повод минатонеделните териристички акти во Париз и нападот на весникот „Шарли ебдо“.
– Терористичкиот напад врз весникот „Шарли ебдо“ ја погоди Франција во срце. Во име на француската влада и народ сакав да ви изразам искрена благодарност за силната порака на поддршка и солидарност која во овие трагични околности и ја упативте на Франција – вели Фабиус во пораката на благодарност упатена до Македонија.
Потребна ни е, додава францускиот министер, колективна и обновена определба за одбрана на слободите и заедничка борба против тероризмот.
Франција ќе продолжи со напорите во таа насока и знам дека можам да сметам и на поддршката од вашата земја, потенцира Фабиус.
Република Македонија преку своите институции и Министерството за надворешни работи минатата недела го осуди варварскиот напад на седиштето на весникот „Шарли ебдо“.
Во овие тешки моменти би сакале да ја искажеме нашата поддршка во борбата против ова варварство кое пркоси на вредностите кои ни се драгоцени, како што се слободата на мислење и изразување, напиша министерот Попоски во писмото до својот француски колега.
Тој додаде дека Република Македонија остро ги осудува овие кукавички акти на терористите и застанува рамо до рамо на страната на Франција во борбата против тероризмот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
